Aona ade ma sabua-bua nggahi ake ede du "Ntau" nggahi Indonesia na "Punya", ro "Wara" nggahi Indonesia kaina "Ada". Nggahi ntau ro wara sandede ntenempa, ntuwu ringata nggahi ra patua dou ma tua ma ulu-ulu. Di ela ro bi'a, di caca ro tui ba ndai ara dunia. Ntau mustiku bae angina labo wara, ndede walija wara wati pehena kalanga labo ntau.
Bata mpa ntau watisi wara, mpoa mpa wara watisi ntau. Ntau ro wara ededu laina katanda mpoakai mboto dana ro dembi, lai mpoana masa ro piti, lai mpoa rauna kanggihi ro kanggama. Malaisi ntau ro wara ede ta ka ndentaku labo ntau ro wara ade ro loko, neo rima ro neo langga. Nggahi "wara" ede na bae angina labo nggahi "kawara". Kawara Ruma, kawara weki, labo kawara angi. Edeku ampona bareka ntau ro wara.
Ade one kaina ntau ro wara ede, ta kawara ku ru,u di ma ntau ndo,i. Ntau ro wara watisi bi'a ra cengga, na bata mpoa. Watisi laon di ra'a ro nana, peke ro sambadi, hi'i ro huri, na soe bune sia, na lelo bune lili, ro na tantobu lao bune kalubu.
Ntau ro wara sandede ntene aona ededu ntau ro wara ma tampu'u kai wara ta ma salalo mborata ara dunia ake wati loana mboka ro kura. Hampa ba ka'ake kaina sacanggi ru'u ta sacanggi, sa basi si ta ntau poaku sabasi, sa doku ro sa tewu sandede rauja arujiki di raka bandai, bune si ntika edeku ntau ro wara ra ka'ake kai ba ndaina Ruma.
Ade ntau ro wara ma sandede ede, ta ngupaku barekana. Ampona ntudu ro rongga, roci ra neona arujiki ra ka'ake kai ba ndaina Ruma. Aina nefa jeka ro ganta, bantu ro tulu angi edeku ampona hoso ro husu ntau ro wara ta.
Doro Nteli, 16 April 2019
Aima Sidi, Mai Tio Kanggihi.
Komentar
Posting Komentar