“Ain Longa Mpoa Sakola, Longa Sara’aku!”

“Ain Longa Mpoa Sakola, Longa Sara’aku” ededu nggahi ro eli dou ma tua-tua ra amalamat kaina ana ro wa'ina. loakudu ndadi na dou ma sapoda-podana dou. 

Nggahi ra eli ake na wancuku dese ro ntasan. Sa desena nggahi Mbojo sa cukina ngoa ro tei ma ntuki dei loko ro ade mpida. Cou-cou ma dei longa  ro loa, pabua to’iku kalampa nggahi ma sabua ede. Nggahi ma wancu ese ake na wancuku dei ra dese aona.  Di ma oto ro dende ade lampa rawita ara dunia ake.

Bunesi ntika rombe ta fare, wati loata rombe mpoa. Ta kamoci ra kamoiku sa lu’una dei loko sa losana ndadina sera. Kurasi ambi ra lembo ta ade hidina Ilmu, ta usahaku lembo ra ambi ta ade rawi ro ruku. Bata mpa dese ro ntukina Ilmu, na kura-kurasi kalibe ro tabe’a, na bonasi rawi ra ruku.  Nggahi ra eli ede na ngoaku ndai manusia. Wa’usi longa, ta kandentaku labo bade. Bade au dei rawi ro wa’a, bade au di lambe ro weha, ro bade di nggahi ro kalosa.

Ma kadua kaina ededu na ntau ao, daita manusia wati loata eda ro ntanda ni’i mpoa lampa rawi lenga ro iwa. Au walipu rawi ma di ru’u sama ro dou ma ndiha. Ma ao angi labo nggahi ma ka dua kain ake, waraku sabua mpama (cerita) ma poda ndadi. Ededu warakku dou ma eda mpoa rawi lenga ra iwa ma kalai, sapoda kain rawi ede diru’u ra one ndain. Akeku pahuna dou ma sakola mpoa, ma dantau fiki hau ade, maja ro jule. Do’o ro langa to’i ndaita ade tabe’a ma ndede rupa. Warasi di karawi sama, ta karawi samaku kone na mangga sabuci ro saliki.

Ma ka tolu kaina. Ta ka do’o ro langa to’iku sarumbu labo sifa ni’i ade ta ma sampu ro ma nggele. Tana’o aina ni’ike wara aora onena ru’u ainaina tua ro dawa’u ina ro ama ainaina ma kento pede. Dou ma da ni’i ke waraku ncewina, ededu wati loana eda mpo sampu ro nggele maru ro doho kaina. Sa wa’u ba ede dou ma da ni’i ro ka’oe ededu dou ma tana’o to’a ro kaco’i dou ma tua. Nggara ta ntausi ni’i ra ka’oe ade ma sampu, wou ro nggele, bune bempa mori takangka ina ro amata wunga tua ra da wa’un pede? Di ma waca ta’i ro tari’i (sera ma tani ro sera ma neo) ina ro ama ta pede coukku di tende ro kakai ta? Malaisi ndai di ana ra nggana.

Sandede wa’umpa lampa rawi sanai ake di loata ka’ao ro maknai.

Malang wunga sekena ura na’e.