Dongeng si Macan dan si Kerbau
"Oe Ama Gejo! Horu toipu nahu kamanae! Kamadera ngaha sipa ba Ama Meco!” Nggahi kaiba Ama Seho
"Babausi ndadi ngaha hade kaiba Ama Meco?" sodi ba Ama Gejo
"Nahu kawaura sake labo sia. Bune santika mpore si nahu ba pahaba ba Ama Meco, ade nahu ndadi ngaha ba sia. Ndededu ra- sake nahu ai saram bana," ngoa kaiba Ama Seho.
Nahu wati disaku horu nggomi. Nggomi wau mancara. Babau ndadi disakai sake ai saram bana ede. Lao raipu nggomi. Aina ntoimu ake dei. Nangahaku ba Ama Meco nahu wali watisi rai mbora nggomi ake dei," nggahi Ama Gejo.
Ntaa nabala mpara ai, wontu lalo kai Ama Meco di uma Ama Gejo.
“Wati edamu Ama Seho ma mai ake dei akande Ama Gejo?" sodi kaiba Ama Meco.
"Waura kau ba nahu lao rai. Nahu wati disaku horu sia. Dahu adeku di nggomi," cambe kaiba Ama Gejo.
Nawancuku dabaena Ama Seho. Waura rungkana nggahi rasake labo nahu," nggahi Ama Meco.
"Lao fou bau rocipu. Tio kabaepu raa kopa sia. Maraka ntenempa ba nggomi peade," kauba gaja.
Edempara lao fou batu wali kaiba Ama Meco. Tio kabae kai na raa kopa Ama Seho.
Pala Ama Seho na lao rai rakaku Ama Mejo mangge’e cili weki di woha doro. Narahoku wekina horu toiba Ama Mejo.
Nggahi kaiba Ama Mejo, "Ai Kamanae! Kone wekindaiku wati wauku horu, nggara na fousi ba Ama Meco, Lao rai rocipu di bee kombi lirina. Aina ntoimu ake dei. Nahu dahu adeku.”
Edempara rai wali kai Ama Seho. Pala wau ba ede rongga lalokai Ana Meco. Sodi kaina tabeku lirina Ama Seho.
Cambe kaiba Ama Mejo, "Nawaura lao rai tabe kom bi lirina. Wati disaku kau ntoi ara ake. Nahu dahu adeku di nggomi. Ma ai ake lao rai batu rocipu sia ede. Kombi marakampa di woha ncai peade."
Edempara rai wali kai Ama Meco. Fou coco kaina Ama Seho. Batuna ra raa kopana matada di neai ede. 119
Raka kaina di sabua hidi, narumpaku ba Ama Seho Ama Mbeo ma wunga toko di kengge talaga
"Ai, Ama Mbeo. Tulu ro bantu toipu nahu ake. Wali ngawamu, konepu wati karaho mpabuaku dinggomi. Kasi toipu kai ade nahu ake," nggahi kai Ama Seho.
Ausi ra rawimu ndadi nggahi ndedekaimu, Ama Seho?" sodi kaiba Ama Mbeo.
"Nahu wunga seke ngupa ba Ama Meco. Naneeku ngaha wea ade nahu," cam be kaiba Ama Seho.
"Ausi tampu ro tampanana, wara kai ndedena?" sodi wali ba Ama Mbeo.
Edempara nuntu lalo kaiba Ama Seho samenana mawaura ndadi.
"Ntoina nahu nawancuku mpeke sarum buku basupu dancihi ngahaku. Edempara eda kai angiku labo Ama Meco. Nangawaku paha kampore nahu sura mbeiba nahu adeku wausi mpore sarumbuku. Ma ai ake nahu kawaura mpore. Ede nontona ndadi ngupa kaiba Ama Meco ede,” nuntu kaiba Ama Seho.
Nggara ndedesi, toko midipu di kontu nahu di kengge talaga ake," ngoa ba Ama Mbeo.
Samporo wau ba ede, tantobu lalokai kalubu barai kaiba Ama Meco.
"Ai Ama Mbeo! Aradu Ama Meco. Sabua mangawa podaku horu nahuro? Watisi ngawamu nahu tahopu lao raiku," sodi kaiba Ama Seho.
*Kamidi romora isi nurumu! Aina cunge-range asamu nggara maneesi mori," nggahi kai Ama Mbeo
"Kasi romora ademu di nahu, sabae!" cambe ba Ama Seho.
“Toko kamidipu wekinu di kontu nahu di kengge talaga ake. Wati edamu isi nara Ama Meco aka?" nggahi Ama Mbeo.
Edempara batu kaiba Ama Seho parenta Ama Meco. Samporo wauba ede wontu lalokai Ama Meco.
"E, Ama Mbeo! Peso toipu wekimu ede dei. Nahu ma nee nggodu kamupu kalea koha tuta Ama Seho. Sia madabae lako, macau rungka rasake. Nawaura kahompa ro keko nahu sabune-bune kombi ntoina," nggahi Ama Meco di Ama Mbeo.
"Aina pana nggali kandede kamanae! Tio-tio toi waupu. Au edamu ade talaga aka?" nggahi kai Ama Mbeo.
"Bahausi ndadi nggahi ndede kaimu nggomi?" sodiba Ama Meco
"Warakai nggahi ndede nahu, babaina sinci ademu," cambe kuiba Ama Mbeo.
"Sabua maneeku ao nahu banggomiro?" sodi kaiba Ama Meco.
“Kamidi romodu asamu. Aina mboto nggahimu labo nahu, cambe kaiba Ama Mbeo.
"Kanadaku ba nahu koha tutamu," nggahi Ama Meco.
"Sabua wati bademu dunia mawaura wari wekiro banggomi?" sodi kaiba Ama Mbeo.
"Wari weki bune wali?" cambe kaiba Ama Meco.
"Ntoina, maca ku mangaha mbee. Pala maai ake mbeeku mangaha maca," nggahi kai Ama Mbeo.
"Edera nggahi cowa dabae ede deide" cambe kaiba Ama Meco.
"Watisi imbimu, mai tio japu ara ake. Kanggangapu isi mada tutamu ade talaga ake," nggahi Ama Mbeo.
Edempara lao raka kaiha Ama Meco kengge talaga. Ntanda caawa kaina oi talaga. Nacadaku nara maca malabo mbee ade talaga ede.
“Mawaura eda mawara ade talaga akaro?" sodi kaiba Ama Mbeo.
Nambora akaku nahu, kamanae!" cambe ba Ama Meco.
“Ede kantakaiba nahu mboto nggahi labo nahu. Kangaha kamupu weaku kalea koha tutamu, mambotosi rawimu ake dei," ngahi Ama Mbeo.
Kamidi lalo kai weki Ama Meco basupu ringana nggahi Ama Mbeo mandede.
"Atao kombi kangahaku banahu ake wau nggomi akeni?" nggahi Ama Mbeo.
"Woja samba mandompa mandoromue” nggahi Ama Meco.
Nggoncu sadeka lalo kai Ama Mbeo di kompe Ama Meco. Wedi lalokai ama Meco madacihi-cihi. Edempara rai hade kaina wekina sampe di be kombi sumpuna.
Edempara hari ro kanggica kai Ama Seho basupu edana rai Ama Meco ede.
Ntika sanawa kai Ama Meco di wombo sabua haju. Pala di sanga ro elo haju ede nawancuku mboto bote. Basupu edana wara Ama Meco kamidi lalokai weki sia doho. Wati wara ma disa londo ngupa ngaha. Nadahu menaku ngahaba Ama Meco.
Sabune-bune kom bi ntoina kamidi kaina wekina, nggahi lalokai ruma sia doho.
“Tahopu rojo ulu bandai Ama Meco awade. Naloaku tuu wii ndai ake,” ndede nggahi ruma Ama Batu doho ede.
Satuju menakaiba lenga dohona ranggahi rumana ede.
"E, Ama Meco. Ausi langoro kai howimu? Maipiku hompa- mu edaba nami," nggahi Ama Batu.
"Ai cinae! Nahu ndadi satoi dangaha hade kaiba Ama Mbeo. Ede rai kai nahu basupu dahu adeku, cambeba Ama Meco.
“Ohooooo.. " hari kancihi kai ade Ama Batu
"Babausi ndadi hari kampaa-mpaa kaimu nahu banggomi?" sodi kaiba Ama Meco.
Buneku dahari kai nahu labo nggomi mawaura tipu ba Ama Mbeo," cambe ba Ama Batu.
"Nggahi cousi tipu nanahu? nggahi Ama Meco.
Watisi inbimu, mai talao samaku labo nami, cambeba Ama Batu.
Tahompani! Mai londo dohora!" nggahi Ama Meco.
Edempara londo mena kai bote mawara ese sanga haju ede. Neo mena kai ade sia doho, basupu naloara lao ngupa ngaha mena.
Waumpara baede, mafaka lalokai Ama Batu labo Ana Meco cara lao lampa aka hidi Ama Mbeo.
"Nggomi manggoncu di sanga haju, nahu malampa taawa dana," nggahi Ama Meco.
“Wati tahona kandede. Nahu wati loaku nggoncu maroci bune lampa nggomi. Peade wati sama ronggata aka ludi aka," cambe ba Ama Batu
"Kabuneku ruana nggahi nggomi?" sodi kaiba Ama Meco .
Nahu manente kontu nggomi," cambe ba Ama Batu.
"Ede mena mancewi taho," nggahi Ama Meco.
Edempara nente lalokai ba Ama Batu kontu Ama Meco. Lampa kai sia doho. Pala rak ampara doona, iu lalokai ba Ama Batu ei madana basupu caru iuna. Maru lalokai sia di kontu Ama Meco sampe badeba Ama Meco.
"Babau ndadi maru kaimu nggomi?" sodiba Ama Meco.
"Wati wauku sia ei madaku," cambe kaiba Ama Batu.
Madabae podaku pala nggomi ake?" nggahi Ama Meco.
"Nggara ndedesi, tahompara cua dikita keto, babaina ei mada nahu," nggahi Ama Batu.
Edempara cua diki lalaokaina ketona. Nawaura ndapo keto sia doho dua.
Lampa lalokai sia doho kai ketoma waura ndapo dua. Bune dou ma nente jara doho Ama Batu di kontu Ama Meco.
Sabune kombi ntoina lampa sia doho, rongga lalokaina di hidi Ama Mbeo labo Ama Seho
"Akadu sia doho dua," nggahi Ama Meco.
"Oe, Soba! Nggomisi manee ngaha Ama Meco?" sodi kaiba Ama Batu.
"Ohoooo. ntoi podadu daeda angi ndai dua basupu wara nconggomu di nahu. Ake madisadu mai ara ake bawaura rakamu Ama Meco ndadi cola kaimu nconggomu di nahu. Mai laara roci. Mbeimpudu nahu Ama Meco ede. Nahu wunga hido lokoku. Laara roci poda, nggoke!" nggahi kanggica Ama Mbeo nggoncu salahona di tando Ama Meco.
"Woja sambamue! Macola kaidu nconggomu pala weki nahu ake?" nggahi kai Aina Meco.
"Ndadi cola romo kaina. Mai rocir!" cambe kaiba Ama Mbeo.
"Woja samba mandompa mandorona. Nggara ndedesi tahopu rai hadeku wekiku," cambe ba Ama Meco.
Edempara rai kasida lalo kai Ama Meco. Mabu lalokai Ama Batu. Pala ketona mbuipu ntanggana di keto Ama Meco basupu watipu ralo’a.
Kataru tea lalo kai cli tuta Ama Batu hinaba wadu ro haju sanaru ncai. Edempara made kai Ama Batu basupu mbia tutana. Pala wati kone ntoina wauba ede, made batu lalo wali ba Ama Meco basupu hompana.
Edempara cumpuna.
Arsyad Siddik. 1980.Tutur Jenaka Dari Bima. Proyek Penerbitan Buku sastra Indonesia dan Daerah.
Komentar
Posting Komentar