Dongeng si Macan dan si Kerbau
Bersambung.......
Arsyad Siddik. 1980.Tutur Jenaka Dari Bima. Proyek Penerbitan Buku sastra Indonesia dan Daerah.
Wara-wara ruana sabua sahe mawa’ura wancu mpeke. Sabua ainaina, eda kai angi sia labo ama Meco.
Nggahi kaiba ama Meco, “E, Ama Seho! babausi ndadi mpeke kabange kaimu nggomi?”
Cambe kai ba Ama Seho, “Buneku da mpeke kai nahu, basupu dancihi ngahaku.”
Nggahi kaiba Ama Meco, “mangawasi sake labo nahu, nahu masanggu kampore nggomi,”
“Taho wekina,” cambe kaiba Ama Seho.
Nggahi kaiba Ama Meco, “poda-poda ngawamu sake labo nahu?”
“Ngawa, sura poda mpore sarumbuku. Pala ausi ndadi wua sake ndai dua ede?” sodi kaiba Ama Seho.
“Ndakeku. Ma wa’usi mpore, nahu ma ngaha ade nggomi,” nggahi kai Ama Meco.
“Taho wekina,” cambe wali kaiba Ama Seho.
“Nggara ndedesi, maira lao batupu nahu,” rece kaiba Ama Meco.
Edempara lampa batu kaiba Ama Seho Ama Meco ede. Lao menakaina nggaro ma wancuku nggini ba haju ro ntadi ndi loa ngaha ba sahe.
Ntika na ronggampa di sabua nggaro, kau lalo kaiba Ama Meco lu’u ngaha kampoi menana ma wara ade nggaro ede.
“Bune nggara na maisi dou ma ntau nggaro?” sodi kaiba Ama Seho Ama Meco.
“Aina dahumu. Wara nahu di matonggu nggomi. Nahu magaro kalea tuta douede nadisasi hako ro kancoki nggomi, “cambe ba Ama Meco.
Lu’u ngaha lalo kai sahe di ade nggaro ede. Lu’u batu kaiba maca. Ngaha lalo sahe ede madassia ro sara. Nawa’ura buntu kone lokona ba mbocu.
Wa’u mpara ba ede mai lalo kai dou mantau nggaro. Na hinaku eda leli mpoi isi nggaro ra nggudana banonto ngaha kapule ba sahe. Edempara dpmpo lalo kaina sanga haju bune na’e ancu, ndadi pala kaina sarumbu sahe.
Lu’u lalo kai dou ede ade nggarona. Pala sawatipu denina labo sahe, nta’a na edaku maca ma kadora mada ro balange woina.
“Woja samba mandompa mandorana. Palasi wara binata jahana ade nggaro ake,” nggahi dou ede.
Lao rai lalo kai dou ede sampe tabe kombi lirina. Edempara ngaha wali kai sahe ede mada ncihi-ncihi sampe losa wa’a kone ta’ina.
Nggori ngahana, lao nono wali kai sia di talaga ade nggaro ede. Wa’uba ede toko sanawa kai sia ba supu mbocuna.
Edempara ndadi rawi sahe sabune-bune kombi ntoina sampe raka kaina mpore sarumbuna. Nawa’ura tuntu hi’i sarumbu sahe ede. Kerena ma naru nawa’’ura horo mpoi. Hurina wa’ura niu kakila. Wangana nawa’ura lino kancilo ba nonto mpore sarumbuna.
Kajarujoro oi fela maca basupu edana mpore sahe. Ipiku ne’ena ngaha ade sahe ede.
Edempara nggahi lalo kai Ama Meco, “He Ama Seho! Eda ba nahu ma wa’ura mpore poda nggomi kamanae! Bunesi ra sake ndaita ai ra tampu’u ro tamponana?”
“Io, kawaraku banahu ra sake ndai ntoina,” cambe kaiba Sahe.
“Ndadi ake nahu kane’era ngaha ade nggomi,” nggahi maca.
“Taho wekina, pala mbei to’i wa’upu mori nahu sampe nai sidisi. Nahu mane’e eda kacumpu wa’u dounia ake, basupu nahu ndadi mamade ngaha ba nggomi,” cambe kaiba sahe.
“Taho wekina,” nggahi walikai maca.
Edempara diki kai sahe ama ngadi ede. Cua maru menakaina di ade ngena kaina bala ai.
Pala sahe wati ipi ntoi maruna. Rakampara boha ai kakente lalo kai sia. Edempara mama bisa kaina ai radiki kai.
Wati kone ntoina wa’uba ede, rai lalo kai sia basupu dane’ena made ngaha ba maca. Lao rai raka kaiba sia gaja dikengge doro.
"Oe Ama Gejo! Horu toipu nahu kamanae! Kamadera ngaha sipa ba Ama Meco!” Nggahi kaiba Ama Seho.
"Babausi ndadi ngaha hade kaiba Ama Meco?" sodi ba Ama Gejo.
"Nahu kawaura sake labo sia. Bune santika mpore si nahu ba pahaba ba Ama Meco, ade nahu ndadi ngaha ba sia. Ndededu rasake nahu ai saram bana," ngoa kaiba Ama Seho.
Nahu wati disaku horu nggomi. Nggomi wau mancara. Babau ndadi disakai sake ai saram bana ede. Lao raipu nggomi. Aina ntoimu ake dei. Nangahaku ba Ama Meco nahu wali watisi rai mbora nggomi ake dei," nggahi Ama Gejo.
Ntaa nabala mpara ai, wontu lalo kai Ama Meco di uma Ama Gejo.
“Wati edamu Ama Seho ma mai ake dei akande Ama Gejo?" sodi kaiba Ama Meco.
Bersambung.......
Arsyad Siddik. 1980.Tutur Jenaka Dari Bima. Proyek Penerbitan Buku sastra Indonesia dan Daerah.
Komentar
Posting Komentar