Mpama Mbojo: Mpama Dou Ma Mpinga Sa Uma-uma

Ilustrasi Gambar Tunarungu

Wara-wara ruana dou ma mpinga sa uma-uma. 
Mpinaga amana, mpinga inana, mpinga anana, mpinga adana, ada siwena.

Wara kai sabua ainaina, anana ede na lao tonngu mbe’ena mangaha awa tolo. Mbe’ena ede wara tolu mbua,. Ntika nawara lalo dou duana malampa, mane’e lao di rasa Kolo.

Edera sodi kaina ana dou ede, “E nggoke, ­­­­be ku ncai malao ese Kolo?”

Edera cambe kaina ba ana dou ede, “mbe’e mbo ake mbe’e amaku, mbe’e siwe ake mbe’e inaku, mbe’e to’I ake mbe’e ndaiku”.

Edera ringa kai cambe ba anadou ede ba dou akande, “ na mpingaku poala ana dou lako ake. Maira talaoku lampa”.

Di kontu dou ede, na dula ra anadou ede di umana. Pala inana wunga medina kafa.

Edera nggahi kai baa nana, “Ai Inae…wara dou duana akande ma sodi la mada. Cou mantau mbe’e ngenamu ede? Edera cambe kaiba la mada, mbe’e mbo, mbe’e amaku. Mbe’e siwe, mbe’e inaku. Mbe’e to’I, mbe’e ndaiku”.

Cambe kaiba inana, “ai anae…ede si boco, boro si boro, sura wara ndadi salongi kai cada mboko amamu”.

Ntika samporo mpara ede, na rongga ja ra amana ma dula di doro.

Edera nggahi kaiba inana, “ai ama la Dambe…ma loa podara boro mandede. De cambe kai ba nahu, ededu na boco so boro, sura wara ndadi salongi kai cada mboko amamu”.

Cambe kaiba rahina, “nggahi aun ma turu karawi lako ndede. Bune ai nahu ma ne’e angi labo la Mpano?”

Edera lao ngupa kaina la Mpano. Pala la Mpano wunga mbajuna mubu.

Edempara nggahi kaiba rumana, “Ai Mpano….nggahi puamu akande, nahu ma ne’e angi labo nggomi, binata ake loa podara nggahi. Ka reweku asamu ba nahu”.

Edera cambe kaiba ala Mpano, “Ai rumae….kone poda mpala mada ada dou sampuru ruma, wati poda-poda ca’uku ndu’u mubu di nocu-nocu”.

Ndede nuntura mpama dou ma mpinga sa uma-uma

Sumbe : Arsyad Siddik. 1980. Tutur Jenaka dari Bima. Jakarta: Proyek Penerbitan Buku Sastra Indonesia dan Daerah.